WANNEER GOD DIE RES OORNEEM

📖 “Die Here sal vir julle stry; julle moet stil wees.” Exodus 14:14

Ons raak so maklik moeg omdat ons probeer om alles self te dra. Ons wil elke deur oopstoot, elke probleem oplos en elke uitkoms beheer. Die mens leef dikwels asof alles van hom afhang. Maar diep binne-in hierdie rustelose gejaag lê ‘n stille vrees: “Wat as ek nie genoeg doen nie?” En so probeer ons die “hoe” en die “wanneer” beheer, terwyl God ons eintlik nooi om Hom weer as Vader te vertrou.

Om jou deel te doen beteken nie dat jy alles moet beheer nie. Dit beteken eenvoudig om gehoorsaam die saad te plant, in geloof te wandel en jou beste te gee. Maar net God kan die reën stuur wat die groei sal veroorsaak. Net Hy kan lewe laat ontkiem in dinge wat vir ons dood lyk. Paulus skryf: “Ek het geplant, Apollos het natgemaak, maar God het laat groei.” (1 Kor. 3:6). Daar is ‘n vrede wat kom wanneer ‘n mens uiteindelik besef dat jou beperkinge nie God sin is nie.

Die Hebreeuse woord vir “stil wees” in Exodus 14:14 dra die betekenis van rus, stilword en ophou om angstig te worstel. Dit beteken nie passiwiteit nie; dit beteken vertroue. Die Rooisee het nie oopgegaan omdat Israel sterk genoeg was nie. Dit het oopgegaan omdat God getrou was.

Dink aan ‘n boer wat sy saad geplant het. Ná dae van harde werk kan hy nie in die nag uitgaan en die saad uit die grond trek om te kyk of dit groei nie. Hy moet terugstaan en die proses aan God oorlaat. Só wil die Here ook hê dat ons soms moet rus in Sy getrouheid.

Liewe Vriende, wat vir jou soos ‘n einde of ‘n onmoontlike hindernis voel, is dikwels die doek waarop God besig is om Sy volgende wonderwerk te skilder. Jy het gedoen wat jy kon doen. Nou sê die Vader: “Laat Ek die res hanteer.”

💭 Nadenke:

… Watter area van jou lewe probeer jy nog beheer in plaas daarvan om dit aan God toe te vertrou?

… Kan jy vandag rus in die waarheid dat God se vermoë baie groter is as jou vermoëns?