Deur Elsabie van der Westhuizen
Die doel van hierdie boek is eerstens om aan die Here eer te bring deur die wonder van Sy betrokkenheid in ons tye van trauma en verlies te verwoord. Dit is ook my poging om die wonderwerke wat ons voor, tydens en ná ons seun se dood beleef het, te deel sodat dit hoop en bemoediging kan bring aan dié wat tans deur rou gaan.
Tydens ’n onlangse skryfkursus saam met die joernaliste van Skryfgeheime is die behoefte aan só ’n boek duidelik bespreek. Buiten hierdie bevestiging het ek egter ook ’n diep dringendheid in my ervaar om gestalte te gee aan ’n boek oor die verlies van ons kind. ’n Kernfokus van die boek is die verhouding met God binne die gesin, asook die rol van geloof in die lewe van ’n kind. Ek deel ook eerlik die ervarings van elke gesinslid, insluitend die foute wat ons gedurende ons rouproses gemaak het.
Die boek sluit af met ’n toegewyde hoofstuk oor die rouproses in sy geheel. Hierdie hoofstuk is gegrond in ons eie belewenis as gesin, maar word ook versterk en bevestig deur aanvullende navorsing oor rou en verlies. Waar dit gepas was, is foto’s ingesluit om die werklikheid visueel te anker en die waarheid van die ervaring verder te verdiep. My wens is dat ons verhaal mense wat in wanhoop verkeer, sal help om weer gefokus te wees en om hulp te aanvaar tydens hul eie rouproses. Ná ’n onderhoud op Radio Kansel in die maande na ons kind se dood, het die omvang van mense se stille hulproep duidelik na vore gekom. Hierdie boek word aangebied as een moontlike hulpmiddel, saam met ander bronne oor dieselfde tema, met die besef dat elke mens uniek is en elke verhaal diep persoonlik.
EBoek
180 bladsye
